နယ်သာလန် တိုက်စစ်မှူး ကိုဒီ ဂက်ခ်ပို ကတော့ မန်ချက်စတာယူနိုက်တက်ကို ပြောင်းရွှေ့လုနီးပါး ဖြစ်ခဲ့ပေမယ့် ဘာကြောင့် ပျက်ပြယ်ခဲ့သလဲ ဆိုတာနဲ့ ပတ်သတ်လို့ ပြန်လည် ဖွင့်ဟလာခဲ့ပါတယ်။
လက်ရှိ လစ်ဗာပူးလ်မှာ ကစားနေတဲ့ ကိုဒီ ဂက်ခ်ပိုက ၂၀၂၂ ခုနှစ်မှာ နွေရာသီမှာ ပရီးမီးယားလိဂ် ယူနိုက်တက်ကို ပြောင်းရွှေ့ဖို့ တော်တော်လေး နီးစပ်ခဲ့တာ ဖြစ်ပါတယ်။ ဒါပေမယ့်လည်း ယူနိုက်တက် ဘက်က နှုတ်ထွက်သွားခဲ့တာကြောင့် အပြောင်းအရွှေ့ မဖြစ်ခဲ့ဘူးလို့ ပြောဆိုခဲ့တာ ဖြစ်ပါတယ်။
ပီအက်စ်ဗွီနဲ့ ကစားမယ့် ချန်ပီယံလိဂ် ပွဲစဉ် မတိုင်ခင် သတင်းစာ ရှင်းလင်းပွဲမှာ ဂက်ခ်ပိုက TNT Sports ကို အခုလိုပဲ ပြောကြားသွားခဲ့တာ ဖြစ်ပါတယ်။ “ပြီးခဲ့တဲ့ ၂၀၂၂ ခုနှစ် နွေရာသီမှာ ကျွန်တော် ပီအက်စ်ဗွီ ကနေ ထွက်ခွာဖို့ တော်တော်လေး နီးစပ်ခဲ့ပြီး ယူနိုက်တက်ကို ရောက်လုနီးပါးလည်း ဖြစ်ခဲ့ပါတယ်။ ဒါပေမယ့်လည်း နောက်ဆုံးမှာ သူတို့က ကျွန်တော့်ကို မလိုချင်တော့ပါဘူး။ အဲဒီမှာ ကိစ္စတွေ ဖြစ်ပျက်ခဲ့တော့တာပါပဲ။ အဲဒီအချိန် ကျွန်တော် ဒီမှာ (ပီအက်စ်ဗွီ) ဆက်နေနိုင်သလို တခြား ကလပ် နှစ်ခုကို သွားဖို့လည်း အခွင့်အရေး ရှိခဲ့ပါတယ်။” လို့ ဂက်ခ်ပိုက ဆိုပါတယ်။
ဆက်လက်ပြီး ဂက်ခ်ပိုက“အဲဒီနောက် ဒီကိစ္စနဲ့ ပတ်သတ်လို့ ကျွန်တော် ဆုတောင်းခဲ့တယ်။ ဂိုးတွေ သွင်းပြီးနောက် ကျွန်တော် အဖြေတချို့ ရှာတွေ့ခဲ့တယ်။ ကျွန်တော် ဟက်ထရစ် သွင်းနိုင်ရင် ဆက်နေသင့်တယ် ဆိုပြီးတော့ပေါ့။ ဒါက ကျွန်တော့် အတွက် ကစားသမား ဘဝ ပထမဦးဆုံး ဟက်ထရစ် ဖြစ်ခဲ့တယ်။ အဲဒီတော့ ကျွန်တော် အဖြေ ရှင်းရှင်းလင်းလင်း မရခဲ့ဘူး။ အဲဒီ အချက်ကပဲ ကျွန်တော့်ကို အများကြီး လမ်းပြခဲ့တယ်။ ပြီးတော့ ကျွန်တော့် မိဘတွေက အရာရာ အတွက် လမ်းပြခဲ့တယ်။ အဲဒါကြောင့် အဲဒီ နှစ်ချက်က ကျွန်တော့်ရဲ့ ဘဝ အတွက် လမ်းညွှန်ချက်တွေ ဖြစ်ခဲ့တယ်။” လို့ ပြောကြားခဲ့ပါတယ်။
ကိုဒီ ဂက်ခ်ပို ကတော့ မန်ချက်စတာယူနိုက်တက် နည်းပြဟောင်း အဲရစ်ခ် တန်ဟက်ဂ်ရဲ့ အဓိက ပစ်မှတ် ကစားသမား တစ်ဦး ဖြစ်ခဲ့သူပါ။ ဒါပေမယ့်လည်း အပြောင်းအရွှေ့ မဖြစ်ခဲ့တာကြောင့် မန်ချက်စတာယူနိုက်တက်က အေဂျက်စ် တောင်ပံ ကစားသမား အန်တိုနီကို ပေါင် ၈၆ သန်း (ယူရို သန်း ၁၀၀) နဲ့ ခေါ်ယူဖို့ ဆုံးဖြတ်ခဲ့ပါတယ်။ အန်တိုနီရဲ့ အပြောင်းအရွှေ့ ကတော့ ယူနိုက်တက်ရဲ့ ကလပ်သမိုင်းမှာ ဒုတိယမြောက် စျေးအကြီးဆုံး ခေါ်ယူမှုလည်း ဖြစ်ခဲ့ပါတယ်။
အန်တိုနီဟာ ယူနိုက်တက်ကို ရောက်ရောက်ချင်း ရာသီမှာ ပွဲပေါင်း ၄၄ ပွဲ ကစားခဲ့ကာ ၈ ဂိုးသွင်းပြီး ၃ ဂိုးသာ ဖန်တီးနိုင်ခဲ့သလို ဒုတိယမြောက် ရာသီမှာလည်း ၃၈ ပွဲ ကစားခဲ့ပေမယ့် ၃ ဂိုးသွင်း၊ ၂ ဂိုး ဖန်တီးကာ ရုန်းကန်ခဲ့ရပါတယ်။ ဒီရာသီ မှာတော့ အန်တိုနီက ၁၄ ပွဲ အထိ ပါဝင်ကစားခဲ့ရပေမယ့် မိနစ် အနည်းငယ်သာ ကစားခဲ့ရကာ များသော အားဖြင့်တော့ အရန်ခုံမှာပဲ အချိန်ကုန်ခဲ့ရပါတယ်။ ဒါကြောင့် အမော်ရင် သဘောမကျတဲ့ ဒီကစားသမားကို ယူနိုက်တက်က ရီးရဲလ်ဘက်တစ် အသင်းထံ ရာသီကုန် အထိ အငှားချခဲ့ပါတယ်။
တစ်ဖက်မှာ ဂက်ခ်ပိုဟာ ယူနိုက်တက်နဲ့ အပြောင်းအရွှေ့ မဖြစ်ခဲ့ပြီးနောက် ပီအက်စ်ဗွီ အင်ဟိုဗင်မှာ ၄ လ ခန့် ဆက်နေခဲ့ပါတယ်။ အဲဒီနောက် ပရီးမီးယားလိဂ် ကလပ်ပဲ ဖြစ်တဲ့ လစ်ဗာပူးလ်က နယ်သာလန်သားကို ပေါင် ၃၅ သန်း ကနေ ၄၅ သန်း ကြားနဲ့ ခေါ်ယူနိုင်ခဲ့ပါတယ်။ ဂက်ခ်ပို ကတော့ လစ်ဗာပူးလ်ကို စစရောက်ချင်း ရာသီမှာ ရုန်းကန်ခဲ့ရပေမယ့် တဖြည်းဖြည်း တိုးတက်လာတဲ့ ခြေစွမ်းတွေကြောင့် အန်ဖီးလ်မှာ နေရာ ပိုရလာခဲ့ပြီ ဖြစ်ပါတယ်။ နည်းပြသစ် အာနေး ဆလော့တ် လက်ထက်မှာ ဂက်ခ်ပိုက ပိုမို တောက်ပလာခဲ့ပြီး ဒီရာသီ ပရီးမီးယားလိဂ် အပါအဝင် ပြိုင်ပွဲစုံ ၃၂ ပွဲ ကစားရာမှာ ၁၄ ဂိုး သွင်းကာ ၅ ဂိုးဖန်တီးပေးထားပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
